Як штогод 7 студзеня на ўсюночных у цэрквах было зачытанае пасланне Сабора Польскай аўтакефальнай праваслаўнай Царквы з нагоды свята Нараджэння Хрыстовага. Апрача рэлігійнага зместу былі ў ім агульна кранутыя „цяжкасці сённяшняга часу”.
Больш канкрэтна ў сваёй адозве выказаўся мітрапаліт Сава. Звярнуў увагу на адыходжанне людзей ад веры, што выразна прыспешылася ў час пандэміі. Таму ўсе жывуць у вялікай няпэўнасці і страху. „Свет ёсць неспакойны, – сказаў уладыка, – у многіх краінах парушаецца грамадскі парадак, парушаюцца таксама падставы здаровага царкоўнага жыцця”.
Мітрапаліт Сава сказаў яшчэ, што людзі адыходзяць ад Бога і таму свет стаецца ўбогі духам. Ігнаруецца заклік Хрыста да жыцця ў міры, любоўі і еднасці. Як адзначыў, не трэба аднак падаць духам, але мець свядомасць, што Царква існуе ўжо больш за дваццаць стагоддзяў. За ўвесь гэты час таксама неаднойчы парушаўся грамадскі парадак у свеце, знікалі дзяржавы, цэлыя імперыі, культуры ды філасофскія і ідэалагічныя вартасці. – Царква ўсё гэта перажыла, – сказаў уладыка, – бо заўсёды ўзмацняў яе Дух Святы і ўзмацняе сёння.
У падобным стылі ў сваім святочным звароце выказаўся архіепіскап беластоцка-гданьскі Якаў. Напісаў, што „ў нашыя дамы падкідаюць чужую ідэалогію і светапогляд нязгодны з традыцыяй і гісторыяй”. Архірэй у лісце перасцерагае, што адыходжанне ад Бога заўсёды вяло да трагічных падзей.
Уладыка Якаў заклікаў да больш рэлігійнага жыцця. Народныя калядныя звычаі, святочны стол і дэкарацыі ў дамах назваў „мёртвай традыцыяй, якая не мае нічога супольнага з сапраўдным хрысціянскім перажываннем святаў”. Хаця прызнаў, што дапамагае адчуць іх радасць.
