Гэта абсалютна не павінна было здарыцца. Ліст мітрапаліта Савы з віншаваннямі Маскоўскаму патрыярху Кірылу, які адкрыта падтрымоўвае расійскую агрэсію ў Украіне, выклікаў паўсюднае абурэнне і супраціў у Польшчы і ў свеце. Вялікую шкоду прынёс ён праваслаўным грамадзянам Рэчы Паспалітай, у тым ліку нам – беларусам. Сапраўды мусіць „Вораг веры”, значыць д’ябал-сатана, якога згадвае ў лісце уладыка Сава, да гэтага спрычыніўся. На вялікі жаль палякі – католікі, у моры якіх жывем, і то жывем урэшце даволі згодна, адчулі раптам пэўную насцярожанасць да сваіх братоў і сясцёр у Хрысце. Нейкае здзіўленне, чаму іх пастыр мог такі шкодны ім ліст напісаць.

Мітрапаліт Сава, якому ўжо амаль 85 гадоў, гэта хутка заўважыў. Тым больш, што некаторыя вернікі паднялі яўную крытыку свайго пастыра. Адкрыты ліст у такім духу напісяў вядомы праваслаўны тэолаг і польскі дыпламат Міхал Клінгер.

Праз пару дзён на афіцыйным сайце польскай Царквы было апублікаванае камюніке, у якім мітрапаліт Сава пакаяўся і прасіў прабачэння за свой віншавальны ліст маскоўскаму патрыярху. Тлумачыў, што ён як і ўсе праваслаўныя ў Польшчы стаіць на баку ўкраінскага народа ў яго „імкненні вярнуць свабоду, суверэнітэт і цэласнасць Украіны”.

Камюніке поўнасцю было зачытанае падчас нядзельнай літургіі ў некаторых царквах. У тым ліку ў Слупску, адкуль транслявалася набажэнства на канале TVP Kultura.

Ветэраны польскага ўзброенага падполля, не прызнаючы шчырасці ў пакаянні мітрапаліта Савы, выступілі з ініцыятывай пазбаўлення яго генеральскага звання, прысвоенага яму, калі ў 1994-1998 быў праваслаўным ардынарыем Польскага войска. Пад заявай у гэтай справе да прэзідэнта Анджэя Дуды падпісалася 500 асоб.