Штогод Беларуская служба Радыё Свабода для тых, хто „пашырае межы свабоды для сябе, Беларусі і свету”, прысуджае сімвалічную ўзнагароду „Людзі свабоды”. На гэты раз такую прэмію атрымалі выдаўцы беларускіх кніг. Агулам дзесяць асоб, а ў тым ліку наш сябра з Беластока Яраслаў Іванюк – радыёжурналіст, кіраўнік фонду „Камунікат”, стваральнік інтэрнэт-бібліятэкі і выдавецтва Kamunikat.org. 

Іншыя кнігавыдаўцы, што сталі лаўрэатамі прэміі, вымушаны весці такую дзейнасць у эміграцыі. Яны жывуць і працуюць цяпер у Кракаве, Варшаве, Вільні, Берліне, Лёндане, Празе. З-за рэпрэсій пасля пратэстаў у 2020 г. прадпрымальніцкая выдавецкая дзейнасць у Беларусі амаль немагчымая, хаця некаторым яшчэ ўдаецца займацца выдаваннем беларускіх кніг на радзіме.

Інтэрнэт-бібліятэку „Камунікат” Яраслаў Іванюк ствараць пачаў у 2018 г. У яе рэсурсах цяпер больш за 60 тыс. публікацый. Хаця гэты праект мае лозунг „Беражы лес – чытай кнігі на Kamunikat.org”, то тры гады таму наш сябра пачаў выдавецкую дзейнасць таксама ў традыцыйным кшталце на паперы. Тлумачыць, што да гэтага прымусіла сітуацыя ў Беларусі. Дагэтуль у яго выдавецтве выйшла больш за 40 кніг, сярод іх 13 Уладзімера Арлова, з якім правялі яны шэраг аўтарскіх сустрэч па ўсёй Еўропе.

Віншуем!

Фота: www.budzma.org