У вёсках Нараўчанскай гміны Гайнаўскага павета чытаюць штомесячнік „Часопіс”. Сярод чытачоў пераважаюць жанчыны. Беларускі штомесячнік ахвотна чытаюць Ніна Карпюк з Капітаншчыны, Яўгенія Богуш і Таіса Драўноўская з Міклашэва, Ірэна Харкевіч і Валянціна Ігнацюк з Новага Ляўкова, Міраслава Балтромюк са Старога Ляўкова, Зіна Пацэвіч з Нараўкі, Крыстына Касянко, Вера Клімюк, Галіна Бірыцкая і Марыя Янель з Плянты ды Ліля Кіслая з Семяноўкі. Не пастаянна, але даволі часта еду я з „Часопісам” да Яўгеніі Бура ў Бандары і да Марыі Хлябіч у Рыбакі. 

„Часопіс” чытаюць Віталь Скепка, Канстанцін Целушэцкі і Аляксандр Максімюк з Новага Ляўкова, Віталь Бачынскі з Капітаншчыны, Аляксей Сухадола з Падляўкова і Мікалай Кардаш з Семяноўкі. 

У „Часопісе” цікавыя рэпартажы, артыкулы, аповесці, успаміны, размовы, дзённік рэдактара, запіскі і эсэ. Ёсць што пачытаць і добра дапасаваныя здымкі. Месячнік асабліва любіць чытаць Крыстына Касянко (яе дзявочае прозвішча Грыцук). Яна жыве ў Варшаве. Шмат падарожнічала па свеце. У вёсцы Плянта Нараўчанскай гміны мае бацькоўскі прыгожы дом, вялікі панадворак, шэсць гектараў лесу і стаў каля дому. Вясну, лета і восень пераважна праводзіць у вёсцы. Любіць быць на прыродзе. Летам адпачывае над ціхай пушчанскай ракой Нраўкай (тут Белавежская пушча), збірае маліны і грыбы ў сваім лесе. Гэты лес расце на ўзгорку і высіцца над надрэчнымі прасторнымі лугамі. На левым беразе ракі на балоце і ў кустах маюць свае гнёзды жураўлі.

У гэтае старонне яшчэ нядаўна прыязджаў з Варшавы да Грыцукоў – пісьменнік Яўгеній Кабатц. Падарыў ён спадарыні Крыстыне (ён яе двуюродны брат) свае кнігі. Яна беражэ іх, яны з аўтографамі пісьменніка. У „Часопісе” быў надрукаваны яго цікавы ўспамін пра жыхароў тутэйшых беларускіх вёсак пад загалоўкам „Млын над Нараўкай”.

Янка Целушэцкі