У сувязі з падзеямі ў Беларусі ў складанай сітуацыі апынулася наша старэйшая арганізацыя – Беларускае грамадска-культурнае таварыства. Дагэтуль было нормай, што падчас амаль кожнага ладжанага ім фэсту апрача калектываў з Падляшша заўсёды на сцэне выступалі таксама дзяржаўныя хоры і ансамблі з Рэспублікі Беларусь. Іх прыезд на Падляшша фінансаваны быў Цэнтрам культуры Беларусі пры пасольстве ў Варшаве.

Пасля абмежавання сваёй дзейнасці ў сувязі з каранавіруснай сітуацыяй БГКТ ізноў пачало ладзіць такія фэсты, а іх сезон як кожны год адкрыла Свята беларускай культуры ў Беластоку, якое прайшло 20 чэрвеня ў парку Плянты. На сцэне выступілі ўжо толькі аматарскія калектывы з Падляшша. Але надалей імпрэзу, ладжаную ў асноўным дзякуючы датацыі Міністэрства ўнутраных спраў і адміністрацыі Польшчы, фінансава падтрымаў таксама лукашэнкаўскі Цэнтр культуры Беларусі ў Варшаве. Як ганаровыя госці ў першым радзе для публікі сядзелі яшчэ і прадстаўнікі консульства РБ ў Беластоку.

Гэта выклікала абурэнне дыяспары – беларусаў, якія вымушаны былі ўцячы з Беларусі са страху перад рэжымам Лукашэнкі. Яны таксама прыйшлі на гэтае свята, да таго з бел-чырвона-белымі сцягамі. Яшчэ на ніводнай імпрэзе БГКТ беларуская гістарычная сімволіка не экспанавалася, затое часам можна было пабачыць лукашэнкаўскія чырвона-зялёныя колеры, хаця б у руках гасцей з Беларусі. Мала таго – падчас выступлення „Прымакоў” салістка Яна Латушка нечакана для арганізатараў выйшла на сцэну таксама з бел-чырвона-белым сцягам.

Юлія Косціна з эміграцыйнага фонду ў Польшчы „Беларусь 2020” сказала журналістам, што „беларускія дзеячы з Падляшша не павінны прымаць дапамогі з Мінска, бо гэта крывавыя грошы”.

Безумоўна БГКТ цяпер у вялікім клопаце. Падтрымліваючы сувязі з рэжымам Лукашэнкі арганізацыя праяўляе спрэчнасць з палітыкай польскай дзяржавы, што амаль поўнасцю фінансуе яе дзейнасць. Пра інцыдэнт на Свяце беларускай культуры хтосьці падобна паслаў данос у Варшаву.