13 лістапада ў памяшканні Беларускага грамадска-культурнага таварыства ў Беластоку адбыўся І Конкурс рэлігійнай і народнай песні. Сарганізавала яго Брацтва праваслаўнай моладзі Беластоцка-Гданьскай епархіі. Гэта новая ініцыятыва ў нашым асяроддзі. Што важнае – накіраваная да наймалодшых удзельнікаў, дзяцей і моладзі. Спрыяе яна пашане спадчыны іх продкаў.

Конкурс сабраў шмат удзельнікаў. Гэта дае надзею на будучыню, што наступнае пакаленне ўсё-такі працягне нашу духоўна-культурную традыцыю, нягледзячы на тое, што яно ўжо амаль цалкам польскамоўнае. Як сказаў для радыё Артадоксія свяшчэннік-апякун брацтва, а. Пётр Амяльчук, такі конкурс заахвочвае працягваць і развіваць спеўна-музычнае багацце праваслаўных вернікаў на Падляшшы – царкоўныя напевы і народныя песні, найперш беларускія. Дзякуючы таму дзеці і моладзь захочуць спяваць у харах у цэрквах, таксама выступаць на сцэне падчас беларускіх імпрэзаў.

Журы на чале з Юркам Астапчуком з гурта «Прымакі», уручаючы дыпломы і ўзнагароды, звярнула ўвагу (на польскай мове, вядома), што павінны яны звяртаць большую ўвагу на як мага чыстае вымаўленне няпольскіх слоў песень. Але найважнейшае, падкрэслівала, каб ведалі хто яны і кім былі іх продкі.