Фота з Музея і асяродка беларускай культуры ў Гайнаўцы
26 верасня Музей і асяродак беларускай культуры ў Гайнаўцы правёў апошні ў сёлетнім сезоне фэст з цыклу „І там жывуць людзі”. Адбыўся ён у Тарнопалі ў Нараўчанскай гміне. Ужо 13-ты год арганізатары ў супрацоўніцтве з мясцовымі самаўрадамі ладзяць такія мерапрыемствы ў абезлюднелых вёсках на Гайнаўшчыне і Бельшчыне. Іх мэта – развесяленне нешматлікіх жыхароў, больш часовых як пастаянных, беларускімі песнямі і гэтым прыпомніць культуру, традыцыю і спадчыну продкаў.
У гэтым годзе фэсты з цыклу „І там жывуць людзі” адбыліся раней у Лушчах у гміне Чыжы, Барнацкім Мосце ў гміне Нараўка, Курашаве ў гміне Кляшчэлі, вёсцы Кавэла, што ў гміне Нараў і ў Чахах-Арлянскіх у гміне Дубічы-Царкоўныя. Былі яны арганізаваныя пры фінансавай падтрымцы Міністэрства ўнутраных спраў і адміністрацыі ды сейміка Падляшскага ваяводства.
