Андрэй Мялешка гэта гарадзенскі актывіст і журналіст, у мінулым супрацоўнічаў між іншым з Беларускім Радыё Рацыя. У 2021 г. праз палітычны пераслед у Беларусі ён з жонкай і дзвюмя дачкамі пераехаў жыць у Батумі ў Грузіі. Тут уключыўся ў дзейнасць беларускай дыяспары, арганізаваў канцэрты і сустрэчы, акцыі салідарнасці з Беларуссю, заснаваў гістарычны клуб і адкрыў невялікую краму, у якой прадаваў рэчы з беларускай нацыянальнай сімволікай. Жонка стала працаваць у Міжнародным адукацыйным цэнтры ў Батумі, дзеці тут вучылсія анлайн у беларуска-ўкраінскай школе.
16 верасня пра Андрэя Мялешку пачалі распісвацца шматлікія беларускія незалежныя інтэрнэт-крыніцы ва ўсім свеце. Сталася так таму, што ноччу 16 верасня, калі ён са старэйшай дачкою вяртаўся з чарговай пабыўкі ў Польшчы, у аэрапорце ў Кутаісі іх затрымалі і вырашылі дэпартаваць назад у Варшаву на бліжэйшым рэйсе. Прычыны гэтага невядомыя. Журналісту, які з гэтага моманту пра ўсё пачаў паведамляць рэдакцыі і агенцтвы, сказалі што з такім пытаннем можа толькі звяртацца ў МУС Грузіі.
Была ноч і бацьку з 11-гадовай дачушкай Аляксандрай пасялілі ў пакоі ў нейтральнай зоне. У такой сітуацыі журналіст запатрабаваў ініцыяваць працэдуру па міжнароднай абароне. Яму адмовілі.
У дзень прыехала з Батумі жонка, адвакат, праваабаронцы, сябры. Нікога з іх у нейтральную зону аэрапорта не ўпусцілі. Жонка хацела забраць дачку, але ёй не дазволілі.
Першы раз бацьку з дачкою мелі пасадзіць на самалёт, які вылятаў у Варшаву ў 15.40. Яны праз вакно пабачылі, як кола рабіў самалёт „Белавіі” і пабаяліся, што адправяць іх у Мінск. Шчасліва гэта не здарылася.
Рэйс у Варшаву чамусьці затрымалі аж на дзевяць гадзін. Андрэй Мялешка з дачкою ў польскую сталіцу прыляцелі 17 верасня а 3.30 раніцы.
– Па нейкіх прычынах Грузія не тлумачыць прычыны дэпартацыі і не дае магчымасці абскардзіць рашэнне ці папрасіць прытулку, – патлумачыў гэты выпадак дарадца Святланы Ціханоўскай Франак Вячорка, мяркуючы, што гэта была „хутчэй за ўсё ініцыятыва спецслужбаў”.
Андрэй Мялешка пакуль мяркуе застацца жыць у Польшчы. У яго шмат знаёмых у Беластоку і таму там менавіта спыніцца. Паколькі апынуўся без жылля і грошай, у Інтэрнэце звярнуўся да ўсіх „неабыякавых людзей”, каб дапамаглі наладзіць яму тут побыт. З часам, калі ў бліжэйшыя месяцы не вырашыцца сітуацыя з Грузіяй, яму прыйдзецца забраць у Польшчу жонку і малодшую дачку.
Кампанія BYSOL, якая займаецца дапамогай у такіх сітуацыях, абвясціла грашовы збор. Андрэй Мялешка патрабуе ў ім 5 тыс. еўра на арэнду жылля на тры месяцы, паслугі перакладчыкаў і адвакатаў для афармлення дакументаў і вяртанне ў Грузію або на пераезд жонкі і дачкі ў Польшчу. Палова гэтай сумы была сабрана на працягу тыдня.
