У чэрвеньскім нумары „Часопіса” быў надрукаваны мой успамін пра чыгунку і вакзал у Плянце (Нараўчанская гміна). Больш за дваццаць гадоў прайшло з таго часу, як перастаў ездзіць пасажырскі поезд з Гайнаўкі ў Семяноўку. У Плянце ліквідавалі пачакальню ды некаторыя пуці і семафары. Жыццё тут замерла, заглухла.

Ды вось сёлета ў чэрвені на былым вакзале ў Плянце пачалі рамонт пуці і добраўпарадкаванне запушчаных перонаў. Неўзабаве на пероне паставілі табліцы з надпісам „NAREWKA”, павесілі расклады язды пасажырскіх цягнікоў, паставілі навюсенькую сметніцу.

29 чэрвеня г. г. (у суботу) я паехаў на тутэйшы колішні чыгуначны вакзал у Плянце. Калі прыехаў на сваім ровары і пайшоў на перон, вачам не паверыў. Найперш паглядзеў на расклад і даведаўся, што поезд ужо ездзіць тры разы ў дзень – у пятніцу, суботу і нядзелю – да 31 жніўня 2019 года. Зараз ён меў прыехаць з Гайнаўкі і я дастаў фотаапарат з сумкі. Гэтак званы шынобус (прыгожа памаляваны) прыехаў пунктуальна. У Плянту прыехалі дзве асобы. Рэшта пасажыраў паехала далей – у Семяноўку.

Я і мой сябра Янка Зданоўскі (ён вядомы ў гміне фатограф-аматар) з Плянты пачакалі прыезду цягніка з Семяноўкі, каб зрабіць новыя фотаздымкі ў лепшым асвятленні: не пад сонца, а з сонцам. Дык вось і тое фота!

Тэкст і фота Янкі Целушэцкага