Новы сінгл пад такім загалоўкам 20 верасня – у свой дзень нараджэння – выпусціў беларускі музыкант і мастак Ільля Фаляжынскі, які ўжо шмат гадоў жыве ў Польшчы. Кампазіцыя даступная на ўсіх музычных платформах. Як кажа аўтар, яна пра ўнутраны шлях, поўны сумневаў, болю і пошуку нейкага сэнсу. З тэксту плыве неcпакой і сутыкненьне з нявызначанасцю, адкрываючы ўразьлівасць чалавека перад самім сабой. „Таемны пароль” у песьні сімвалізуе ключ да самапазнання і ўнутранай свабоды. У выніку слухач застаецца з простай, але моцнай высновай: куды б ня вёў шлях, ад сябе не ўцячэш.
Ільля Фаляжынскі раней жыў у Варшаве. Ажаніўся і цяпер з жонкаю і сям’ёй жыве ў Чаромсе. Для Беларускай службы Польскага радыё сказаў, што на Падляшшы адчувае спакой. Ён пачаў купляць газету «Ніва» і «Часопіс», каб падтрымліваць беларусаў і сачыць за падзеямі ў гэтым рэгіёне. Асабліва зацікавіла яго мясцовая гаворка. – Гэта для людзей на Падляшшы асобная мова, – заўаважыў ён, – яны гавораць „па-свойму”, гэта тутэйшая мова.
