29 сакавіка ў сядзібе Беларускага грамадска-культурнага таварыства ў Беластоку адбылася паэтычна-ўспамінальная сустрэча, прысвечаная творчасці Віктара Шведа. Была яна прымеркавана да ста гадоў з дня нараджэння вядомага беларускага паэта з Беласточчыны, які прыйшоў на свет 23 сакавіка 1925 г., жыў звыш 95 гадоў і памёр 22 кастрычніка 2020 г. (пахаваны на праваслаўных могілках у роднай вёсцы Мора на Гайнаўшчыне).

На вечарыну „У маіх вершах – сэрца насцеж…” жонка Валянціна Швед, БГКТ і Цэнтр беларускай культуры ў Беластоку запрасілі сяброў і калег паэта, таксама паклоннікаў і чытачоў яго вершаў з маладога пакалення, журналістаў ды пачэсных асоб.

Дэкламаваліся выбраныя творы Віктара Шведа, успаміналі аўтара калегі з БГКТ, „Нівы” і літаб’яднання „Белавежа”. У тым ліку 90-гадовыя ўжо Яніна Чэрнякевіч, а. Андрэй Беразавец і Янка Зенюк. Сяброўка з Саюза польскіх літаратараў, беластоцкая паэтка Крыстына Канэцкая нагадала, што Ён (…) быў светлы, чысты беларус і пра гэта цяпер трэба гаварыць, хваліць, ганарыцца, шанаваць.

Як музычны акцэнт Люба Гаўрылюк і Ала Каменская – маці з дачкой – праспявалі песні на вершы Віктара Шведа, гімны Беласточчыне.

Фота Міры Лукшы