У мясцовым універсітэце імя Адама Міцкевіча ўжо больш за год дзейнічае гурток пад назвай „Беларусістычная секцыя ва Усходнеславянскім навуковым згуртаванні”.

Ён аб’ядноўвае ўсіх, хто цікавіцца навукай і папулярызацыяй беларускай мовы, студэнтаў розных гадоў навучання і выкладчыкаў. Аб’яднанне было створана у 2023 г., на пачатку навучальнага года. Заснавалі яго студэнты, прычым гэта былі як беларусы, так і палякі. 

Ідэя стварэння гуртка ўзнікла праз тое, што яго стваральнікам хацелася аб’ядноўваць студэнтаў, каторыя цікавяцца беларускай мовай і культурай, а таксама пашыраць гэта сярод іншых навучэнцаў, асабліва палякаў. Дарэчы, сярод апошніх павялічылася колькасць тых, хто жадае вывучаць беларускую філалогію. Аднак, як адзначаюць удзельнікі гуртка, сярод жадаючых вывучаць усходнеславянскія мовы пакуль яшчэ большасць выбірае рускую.

Сярод заснавальнікаў гуртка былі студэнты-філолагі Дар’я Ваніцкая, Дамініка Жэрка, Андрэй Ліхач. На дадзены момант кіраўнічкай Беларусістычнай секцыяі з’яўляецца д-р прафесар Анна Жэброўская. 

Асноўнымі мэтамі секцыі абвешчаны, перш за ўсё, навуковыя даследаванні, сацыялінгвістычныя, псіха-лінгвістычныя, гістарычныя, а таксама папулярызацыя беларускай мовы сярод навучэнцаў і выкладчыкаў універсітэта, а таксама ўсіх неабыякавых. Пад гэтым удзельнікі гуртка разумеюць папулярызацыю менавіта вывучанне беларускай мовы, а таксама яе ўнікальных асаблівасцей, даследаванне таго, як мова ўплывае на культуру і распаўсюджванне сваіх даследаванняў.

Дзеля гэтага ўдзельнікі гуртка ладзяць выставы на студэнцкіх імпрэзах, арганізуюць і удзельнічаюць у канферэнцыях прысвечаных беларускай мове і культуры. 

На прыклад, у красавіку мінулага года яны прымалі ўдзел у Познаньскім дню навуковых аб’яднанняў, у Кірмашы навуковых аб’яднанняў факультэтаў неафілалогіі і этна-лінгвістыкі, дзе арганізавалі майстар-клас па пляценню традыцыйнай беларускай жаданіцы – традыцыйнай лялькі з якой у даўнія часы размаўлялі пра свае жаданні і дарылі ёй падарункі, а яна дапамагала гэта жаданне здзейсніць. Студэнты-беларусісты з Познані таксама арганізавалі і выступалі на 1-й агульнапольскай студэнцка-доктарскай беларусістычнай канферэнцыі, на якую прыехалі госці з розных універсітэтаў Польшчы.

Акрамя таго, у канцы мінулага году ўдзельнікі гуртка зладзілі на „Беларусістычную Вілею”, дзе рабілі падсумаванне сваёй дзейнасці і арганізавалі для ўдзельнікаў квіз і настольныя гульні.

У гэтым годзе студэнты плануюць працягваць сваю дзейнасць і ў траўні павінны ўдзельнічаць у чарговай навукова-даследчай канферэнцыі. Пажадаем ім поспехаў.

Сяргей Александровіч