16 кастрычніка ў адной з вёсак каля Бельска санітарная служба (Sanepid) спыніла пахаванне звыш 80-гадовага мужчыны, бо прыйшоў вынік, што меў ён каранавіруса. Калі людзі зышліся на паніхіду, а было іх шмат, да нявесткі пакойнага, якая стаяла каля труны, патэлефанавалі з Бельска. Загадалі зачыніць труну і каб людзі хутка разышліся да сваіх хат. Санэпід крыху раней патэлефанаваў таксама бацюшку, які меў адслужыць паніхіду а на наступны дзень літургію і адпяванне. Святару сказалі, каб астаўся дома.
Неўзабаве прыехала аўто пахавальнай фірмы і труну з нябожчыкам павезлі ў Бельск. Гэты мужчына памёр у шпіталі ў Бельску. Пару дзён раней адвезла яго туды карэтка хуткай дапамогі, бо раптам цяжка захварэў. Паспелі ўзяць у яго яшчэ вымаз, каб праверыць, ці не мае каранавіруса. Вынік быў станоўчы, але з’явіўся, калі пацыент ляжаў ужо ў труне.
Нябожчыка пахавалі без сям’і, толькі з самім бацюшкам. А родныя мусілі адбыць яшчэ дзесяць дзён каранціну.
