У першых днях лістапада мінула 80 гадоў ад жудаснай гітлераўскай аперацыі вывазу яўрэйскага насельніцтва нашых мястэчак ў лагеры смерці. Сумную гадавіну ліквідацыі гетаў у сваіх мясцовасцях адзначылі між іншым у Орлі, Крынках, Гарадку і Васількаве каля Беластока. Прадстаўнікі ўладаў, грамадскіх арганізацый ды жыхары склалі доўг памяці, наведаўшы гістарычныя яўрэйскія месцы і кіркуты-могілкі.

Асабліва насычанай была праграма ў Орлі. 4-6 лістапада адбыліся там трохдзённыя „Дні памяці” з адмысловым музычным настальгічным канцэртам, прэзентацыяй кнігі пра арлянскіх яўрэяў ды шэсцем на кіркут.

Дэлегацыя з Васількава пабывала ў Трэблінцы, куды 2 лістапада 1942 г. на заўсёды вывезлі яўрэяў з мястэчка, яго кожнага трэцяга жыхара.