У лютым у Сямяцічах, Гайнаўцы, Беластоку, Дуброве-Беластоцкай і Бельску прайшлі раённыя слуханні 32. Фестывалю „Беларуская песня 2025”. 16 лютага ў Гайнаўскім доме культуры адбыліся цэнтральныя элімінацыі. Прыняло ў іх удзел каля 70 салістаў, дуэтаў і калектываў. Найлепшыя выступяць на гала-канцэрце, які адбудзецца 17 траўня ў Падляшскай філармоніі па вуліцы Падлесьнай ў Беластоку.
Беларускае грамадска-культурнае таварыства агляды беларускай песні на Беласточчыне ладзіць з 1971 г., а з 1993-га ў якасці фестывалю. Старшыня арганізацыі Васіль Сегень лічыць, што мерапрыемства служыць папулярызацыі беларускай песні і культуры, якая асабліва прысутная на Падляшшы. – Нашы продкі жылі на гэтай зямлі стагоддзямі, і гэтая культура з’яўляецца тут карэннай, роднай, – кажа.
Як штогод падчас аглядаў можна было пачуць розныя стылі і музычныя формы, народныя і сучасныя песні сола і з інструментальным акампанементам на жыва або з падкладу. Аўтэнтычных фальклорных песень ўжо амаль не было. Пераважалі вядомыя кампазіцыі, у тым ліку „імпартныя” з Беларусі. Але радуе, што выконваюцца таксама песні на музыку і словы аўтараў з Беласточчыны, у тым ліку „белавежцаў”. Ёсць нават цалкам аўтарскія, як у выпадку беластоцкага калектыву „Сувенір”, якога спявак Янка Хоха сам піша тэксты і музыку песень. Ён родам з Тыльвіцы ў Міхалоўскай гміне і хаця як большасць выканаўцаў па-беларуску амаль не гаворыць, беларускае слова надалей носіць глыбока ў сваёй душы.
У параўнанні з мінулымі гадамі фестываль БГКТ цяпер даволі сціплы. З увагі найперш на адносна невялікі бюджэт, пад 90 прац. якога гэта датацыя Міністэрства ўнутраных спраў і адміністрацыі. Да таго няма як калісь значнай прысутнасці на канцэртах прадстаўнікоў мясцовых уладаў ды вядомых палітыкаў. З увагі на сітуацыю за ўсходняй мяжой каторы год не запрашаюцца беларускія дыпламаты, міністры з Мінска ды, на жаль, прафесійныя калектывы з Беларусі, якія гадамі выступалі як знакавыя зоркі фестывалю. Але няма таксама, што крыху дзіўна, амаль цалкам зацікаўленнем удзелам у ім прадстаўнікоў беларускай дыяспары. Хіба што ў якасці вядучых (цэнтральны агляд у Гайнаўцы вяла Ганна Комінч).
Для ўдзельнікаў, якіх ёсць яшчэ даволі шмат, найважнейшая атмасфера такіх аглядаў, поўная радасці, шчасця, усмешкі. Гэта проста свята беларускай песні.
Фота арганізатараў і Міры Лукшы
