15 снежня ў Музеі і асяродку беларускай культуры ў Гайнаўцы былі падведзены вынікі юбілейнага 20-га Усяпольскага фотаконкурсу „Падляшша ў аб’ектыве” імя Віктара Волкава. Прыняло ў ім удзел 181 аўтар (рэкордная колькасць) з усяе Польшчы, найбольш з Падляшскага ваяводства, таксама Мазавецкага, Люблінскага і Ўлёнскага. Агулам прыслалі яны амаль 500 фотаздымкаў, якія прадстаўляюць наш рэгіён.

Дасланыя працы ацэньвалі прафесійныя фатографы, сябры незабыўнага Віктара Волкава. Гэта аўтарка фільмаў аб прыродзе Бажэна Валенцік, журналіст і падарожнік Тамаш Класоўскі, ляснік і кінарэжысёр Яраслаў Хыра і фотарэпарцёр Міхал Косць, таксама дырэктар беларускага музея ў Гайнаўцы Тамаш Ціханюк як арганізатар.

Як кожны год на конкурсных фотаздымках прадстаўлены былі архітэктура, прырода і людзі. На іх відаць таксама як мяняецца Падляшша. Штораз менш ужо традыцыйнага краявіду ды ідылічнай вясковасці як на займальных здымках Волкава. Ідзе новае, якое не такое прывабнае. Гаварылі пра гэта таксама члены журы, якое ацаняла конкурсныя працы перадусім з мастацкага боку, шукаючы ў іх нейкай глыбейшай думкі і рэфлексіі.

Бажэна Валенцік дзякавала ўдзельнікам конкурсу, што на здымках паказываюць „багацце нашага ўсходу, не толькі прыгожую прыроду, захады сонца, зуброў ваўкоў, але таксама тутэйшую культуру”.

Тамаш Класоўскі сказаў, што „калісь Падляшша было прывабным для фатаграфіі, а цяпер гэта складанае, бо тое што старое і характэрнае для гэтага рэгіёну паступова знікае”.

Падляшша надалей застаецца культурнай мазаікай з беларускасцю, праваслаўем, непаўторнай архітэктурай ды ўнікальнай прыродай. Ёсць тут яшчэ што фатаграфаваць, каб дакументаваць такое багацце.

Лаўрэатам першай прэміі ў конкурсе стаў Мацей Бэхта з Варшавы. Журы было захоплена яго фотаздымкам, на якім па-мастацку паказаў купалы царквы са скіта-пустэльні ў Адрынках зімовай парою.

Акрамя прызоў і памятных дыпломаў пераможцы атрымалі ўнікальныя статуэткі, спецыяльна зробленыя мастаком з Нараўкі Славамірам Харкевічам.

Падчас вернісажу з беларуска-палескім рэпертуарам песень выступіў фалклорны калектыў „Жэмерва” з бельскіх Студзіводаў.

Арганізатарам фотаконкурсу з’яўляецца беларускі музей у Гайнаўцы пры фінансавай падтрымцы Міністэрства ўнутраных спраў і адміністрацыі, таксама Падляшскага ваяводства, горада Гайнаўка і Гайнаўскага павета.