Нядаўна здарылася мне ехаць у Мінск у сваіх справах. Тым разам давялося рабіць перасадку ў Баранавічах. Гэта даволі вялікі горад і адначасова буйны чыгуначны вузел, таму пасажыры, што падарожнічаюць з захаду на ўсход, з поўначы на поўдзень краіны ці наадварот, часта там выходзяць, каб потым перасесці на іншы цягнік ці аўтобус.
Чакаць цягніка да сталіцы мне трэба было больш за гадзіну, рабіць было асабліва нечага, таму хутчэй не з цікавасці а проста каб забіць час прайшоўся сабе трохі па мясцовым прадуктовым рынку, што знаходзіцца зусім побач з вакзалам, ды паназіраў, што там прадаюць і за якую цану.
Тыя апошнія на рынку трохі вышэй, чым у дысконтных магазінах, але затое ўсё свежае, спелае ды смачнае. Таму калі ў выходныя добрае надвор’е, то на падобных рынках заўсёды шмат як прадаўцоў, так і пакупнікоў.
У верасні рынак асабліва багаты, прылаўкі поўныя разнастайнай ды рознакаляровай садавіны і гародніны. Прадаюць тут свае, мясцовыя, а таксама дачнікі і фермеры з блізкіх вёсак. Памідоры і агуркі прывозяць з паўднёвых раёнаў, напрыклад Пінскага ці Лунінецкага, дзе гаспадары трымаюць вялікія парнікі. Хапае сярод прадаўцоў таксама пенсіянераў, што прыносяць сёе-тое з агароду – зеляніну, цыбулю ці хатнія яйкі, што нашмат смачнейшыя ад крамных. Асобна стаяць прылаўкі з прывазной садавінай: персікамі, абрыкосамі, вінаградам, дынямі і кавунамі.
Як кажуць прадаўцы, раней хапала прадуктаў з Заходняй Еўропы, напрыклад, персікі прывозілі з Іспаніі. У апошнія гады прадаюць, перад усім, тавар з Турцыі ці былых савецкіх краін. Тыя самыя персікі зараз турэцкія ці малдаўскія, абрыкосы малдаўскія, армянскія ці ўзбецкія, баклажаны з Азербайджану бываюць, дыні з Узбекістану, а кавуны з Расіі.
Цэны на імпартную садавіну даволі высокія па беларускіх мерках, за некалькі апошніх гадоў усё стала даражэйшым. Таму пакупнікоў каля такіх прылаўкаў трохі менш. Вось па якой цане можна на баранавіцкім рынку набыць садавіну і гародніну.
Цыбуля – 1.50 – 2 (далей падаецца цана за кілаграм). Гэта прыкладна 1.80 – 2.40 злотых.
Морква – 1.30 – 2 (1.50 – 2.40 PLN)
Буракі – 1.30 – 2 (1.50 – 2.40 PLN)
Капуста – 2 (2.40 PLN)
Памідоры – 2.5 – 5 (3.10 – 6 PLN)
Часнык – 7 (8.40 PLN)
Баклажаны – 2 (2.40 PLN)
Кабачкі – 1 (1.20 PLN)
Салодкі балгарскі перац – 3 – 5 (3.62 – 6 PLN)
Бульба 1.50 – 3 (восенню цана павінна спасці)
Яблыкі – 1-3 (1.20 – 3.62 PLN)
Лахіны – 11- 12 (13.27 – 14.48 PLN)
Маліны – 10 (12.07 PLN)
Грушы – 3 (3.62 PLN)
Гарбуз – 3 (3.62 PLN)
Абрыкосы – 8 – 8.50 (9.65 – 10.26 PLN)
Персікі – 8 – 10 (9.65 – 12.07 PLN)
Вінаград – 15 (18.10 PLN)
Хатнія яйкі – 5 рублёў за дзясятак, але часам можа быць танней (6 PLN)
На гэтым рынку можна паспрабаваць трохі патаргавацца, але прадаўцы вельмі неахвотна зніжаюць цэны.
Недалёка ад прадуктовага рынку ёсць яшчэ рэчавы. На яго тэрыторыі знаходзіцца мясны павільён. Не паляніўся зайсці таксама і туды і паглядзець цэны на мяса. Свіное філе каштуе там 17 рублёў за кілаграм (20.52 PLN), ялавічына – 19 (амаль 23 PLN), а індык – 20 (24.14 PLN).
Адначасова з даволі нізкімі цэнамі на прадукты, у Беларусі ў параўнанні з Польшчай нізкія заробкі і пенсіі:
- мінімальны заробак 626 руб (каля 755 злотых)
- сярэдні заробак 2 270 рублёў (2740 злотых)
- мінімальная пенсія па ўзросце руб. 441 (532 злотых)
- сярэдняя пенсія па ўзросце 812 рублёў (980 злотых)
Насамрэч, далёка не ўсе маюць гэтыя сярэднія зарплаты ці пенсіі. Таму людзі стараюцца ашчаджаць, купляюць танныя прадукты ці самі штосьці прадаюць са свайго агароду. Тыя самыя пенсіянеры наўрад ці будуць купляць прывазную садавіну, – яны лічаць што гэта дорага.
Хадзіў і глядзеў Сяргей Александровіч
Фота аўтара
