Страшныя абразкі, якія сёння паплылі ва ўвесь свет з Украіны, выклікаюць вялікі боль і слёзы. Ваенны гвалт, які ўчыніла пуцінаўская Расія на суверэннай дзяржаве, не можа мець ніякага апраўдання. Крэмль, які не вызбыўся імперскіх амбіцый, ракетамі хоча накінуць Украіне свой парадак. Салідаразуючыся з украінскім народам у яго цярпенні і змаганні з агрэсарам, сумна і сорамна мне за Беларусь пад Лукашэнкам, якая як аказваецца ў гэтай вайне таксама мачае свае рукі.

Пра тое, што Расія мае план напасці на Украіну, разведка ЗША ведала ўжо пару тыдняў таму. Прэзідэнт Джо Байдэн адразу падняў трывогу на ўвесь свет. Крэмль ў адказ пераконваў, што вайны не хоча. Міністр Лаўроў такія весткі нават называў „укідкамі”. Аказваецца, гэта была толькі тактычная ігра з боку Расіі. Атака наступіла так як паінфармаваў пазаўчора Байдэн – на працягу 48-мі гадзін. Пуціна не здолелі адвесці ад гэтага найбольшыя палітыкі, у тым ліку прэзідэнт Францыі ці канцлер Нямеччыны. Расія не пабаялася жорсткіх эканамічных санкцый, якія пачаў ужо ўводзіць свет.

Не мне павучаць палітыкаў, але не магу зразумець чаму ў гарачыя пункты па-суседску з Данбасам ніколі не былі накіраваныя міжнародныя раз’емныя сілы. Магчыма такое рашэнне будзе, бо збройны канфлікт мусіць закончыцца нейкімі перамовамі. Але пакуль Украіна пакутуе.

Юрка Хмялеўскі

Галоўны рэдактар