2 верасня ў Беларусі адзначаўся Дзень беларускага пісьменства. З 1994 г. такое свята штогод у першую нядзелю верасня праходзіць у гарадах, якія з’яўляюцца гістарычнымі цэнтрамі культуры, навукі, літаратуры і кнігадрукавання. Яго мэтай – „захаванне і развіццё духоўнай спадчыны Беларусі, папулярызацыя нацыянальных культурных традыцый, падтрымка беларускай літаратуры і кнігавыдавання”.
Дагэтуль Дзень беларускага пісьменства адбыўся ў такіх гарадах, як Навагрудак, Полацк, Орша, Нясвіж, Тураў ці Пінск. У гэтым годзе сталіцай свята стаў Гарадок у Віцебскай вобласці. У праграме ўпісаны былі: рэспубліканская навукова-асветніцкая экспедыцыя «Дарога да Святыняў з Жыватворным Агнём ад Труны Гасподняй», Міжнародны круглы стол з удзелам замежных літаратараў, фінал Рэспубліканскага конкурсу юных чытачоў „Жывая класіка”, цырымонія ўручэння „Нацыянальнай літаратурнай прэміі», фестываль кнігі і прэсы, выстава „Бацькаўшчына. У пошуках страчанага”.
Дзень беларускага пісьменства ў Гарадку на Віцебшчыне запомніўся тым, што ў рамках свята быў адкрыты „помнік Букварю” з надпісамі цалкам па-руску ды яшчэ з арфаграфічнымі памылкамі.
