13-14 верасня адбыўся IX з’езд выпускнікоў ІІ-га Агульнаадукацыйнага ліцэя з беларускай мовай навучання ў Бельску-Падляшскім, прымеркаваны таксама да юбілею 80-годдзя школы. У Бельскім доме культуры гасцей вітала і ўрачыста адкрыла з’езд новая дырэктарка беллліцэя Іаанна Якімюк. Гэтую пасаду абняла яна 1 верасня. Была адзінай кандыдаткай у конкурсе, праведзеным Управай павету перад канікуламі. Яна – настаўніца з пятнацацігадовым стажам, ад нараджэння бяльшчанка, якая ў 2003 г. закончыла тутэйшы белліцэй і апошнім часам навучала ў ім польскую мову. Раней шматгадовым дырэктарам бельскіх „Беларусаў” быў Андрэй Сцепанюк, які адышоў на пенсію.

Удзельнікі вераснёўскага з’езду спярша ў Бельскім доме культуры паглядзелі мастацкія выстаўкі выпускнікоў школы – Яўгенні Жук і Міраслава Здрайкоўскага. Затым быў паказ спектаклю тэатра „Чрэво”, прысвечанага Яраславу Кастыцэвічу – легендарнаму дырэктару белліцея ў 1949-1965 гадах.

З нагоды 80-годдзя школы на яе калідоры размешчана выстава „Анатоль Тымінскі – першы дырэктар беларускага ліцэя ў Бельску-Падляшскім” (на здымку). Падрыхтаваў яе Музей Малой Айчыны ў Студзіводах. Анатоль Тымінскі быў таксама праваслаўным святаром.

На другі дзень, пасля набажэнстваў у царкве і касцёле, удзельнікі з’езду – звыш 200 асоб – сустрэліся на афіцыйнай частцы, ужо ў будынку школы. Завяршыўсё ён традыцйным балем у гасцініцы „Unibus”.