У бягучым навучальным годзе 2024/2025 у Люблінскім ваяводстве ўпершыню адбыўся школьны этап Усяпольскай Алімпіяды па беларускай мове. Галоўная тэма XXXI выдання Алімпіяды – Жыццё і творчасць Васіля Быкава.
Алімпіяда мае акрэдытацыю Міністра адукацыі і навукі (пастанова МЕНіС ад 29.01.2002 г. аб арганізацыі і правядзенні конкурсаў, турніраў і алімпіяд), што падкрэслівае яе прэстыж і важнасць у развіцці моўных і культурных кампетэнцый удзельнікаў. Арганізатарам мерапрыемства з’яўляецца Кафедра беларусістыкі Варшаўскага ўніверсітэта. Адрасаваная Алімпіяда вучням, якія цікавяцца беларускай мовай, літаратурай і культурай, і навучаюцца ва ўсіх тыпах школ надбазавага ўзроўню і сярэдніх школ для моладзі.
Першыя адборы адбыліся ў сераду, 4 снежня 2024 года, на Філалагічным факультэце Універсітэта Марыі Кюры-Складоўскай ў Любліне. Удзел у іх прынялі вучні Комплексу сельскагаспадарчых школ Цэнтра прафесійна-тэхнічнай адукацыі ў Пшчэляй Волі і Сярэдземнаморскага ліцэя імя св. Дамініка Гузмана ў Любліне. Асобна трэба падзякаваць рэдакцыям беластоцкіх беларускіх выданняў — штотыднёвіка Ніва і грамадска-культурнага штомесячніка Часопіс – за бясплатнае прадстаўленне друкаваных матэрыялаў для вучняў, якія рыхтаваліся да алімпіяды ў Пшчэляй Волі.
Ініцыятарам правядзення адбораў для вучняў Люблінскага ваяводства стаў а. д-р Андрэй Канаховіч, метадычны дарадца Люблінскага самакіравальнага цэнтра павышэння кваліфікацыі настаўнікаў, а таксама настаўнік вучняў з Пшчэляй Волі. Варта падкрэсліць, што міжшкольныя адборы ў Люблінскім ваяводстве былі арганізаваныя ўпершыню за больш чым 30-гадовую гісторыю Алімпіяды. Дзякуючы намаганням арганізатараў, супрацоўніцтву з Галоўным камітэтам Алімпіяды беларускай мовы пры Кафедры беларусазнаўства Варшаўскага ўніверсітэта і люблінскімі беларусазнаўцамі з Філалагічнага факультэта Універсітэта Марыі Кюры-Складоўскай, атрымалася арганізаваць гэты этап для вучняў нашага рэгіёну.
Адборы складаліся з дзвюх частак: пісьмовай і вуснай. У пісьмовай частцы ўдзельнікі павінны былі самастойна напісаць працу на адну з трох прапанаваных тэм, звязаных з галоўнай тэмай гэтага года. Тэмы патрабавалі ўмення аналізу, аргументацыі і свабоднага валодання беларускай мовай.
У вуснай частцы ўдзельнікі адказвалі на пытанні па загадзя падрыхтаваных творах, а таксама дэманстравалі веды граматыкі і моўных аспектаў. У гэтай частцы важнымі былі як грунтоўнае веданне матэрыялу, так і здольнасць свабодна выказвацца на беларускай мове.
Абедзве часткі адбораў дазволілі ўдзельнікам прадэманстраваць высокі ўзровень ведаў і моўных уменняў, што выклікала прызнанне конкурснай камісіі, у склад якой уваходзілі д-р Наталля Русецкая і д-р габілітаваны Ядвіга Казлоўская-Дода. Вынікі адбораў былі абвешчаныя на наступны дзень і пацвердзілі грунтоўную падрыхтоўку нашых вучняў, якія прайшлі ў другі акруговы этап Усяпольскай Алімпіяды па беларускай мове.
Шчыра віншуем!
айцец д-р Андрэй Канахович
Фота аўтара
